सिंधुदुर्ग प्रतिनिधी,
सिंधुदुर्गनगरी जिल्हा मुख्यालय पत्रकार संघाच्यावतीने जिल्ह्यातील पत्रकारांसाठी टेनिस बॉल क्रिकेट स्पर्धा २९ जानेवारीला सिंधुदुर्गनगरी येथील पोलीस परेड मैदानावर आयोजित करण्यात आली आहे. या जिल्हास्तरीय पत्रकार टेनिस बॉल क्रिकेट स्पर्धेचे चौथे वर्ष असून जिल्ह्यातील सर्व तालुका पत्रकार संघाने आपल्या टीम सह या स्पर्धेत सहभागी व्हावे, असे आवाहन मुख्यालय पत्रकार संघ अध्यक्ष संदीप गावडे व सचिव लवू म्हाडेश्वर यांनी संयुक्तरित्या केले आहे. विजेत्या संघास ७७७७ रुपये, उपविजेत्या संघाला ५५५५ रुपये असे रोख बक्षीस व आकर्षक चषक देण्यात येणार आहे. ही स्पर्धा सुरू होण्यापूर्वी याच मैदानावर जिल्ह्यातील पोलीस अधिकारी आणि पत्रकार यांच्यात प्रदर्शनीय सामना रंगणार आहे. जिल्ह्यातील पत्रकारांना क्रिकेटच्या माध्यमातून एकत्र येवून एक दिवस आनंद लुटता यावा यासाठी सिंधुदुर्ग जिल्ह्यात सर्वप्रथम जिल्हा मुख्यालय पत्रकार संघाने ‘पत्रकारांची क्रिकेट स्पर्धा’ भरवण्याची संकल्पना सुरू करत ती यशस्वी केली. त्याच संकल्पनेनुसार मुख्यालय पत्रकार संघाच्यावतीने सिंधुदुर्गनगरी येथील पोलीस परेड मैदानावर चौथ्या वेळी २९ जानेवारी रोजी जिल्ह्यातील पत्रकारांसाठी टेनिस बॉल क्रिकेट स्पर्धेचे आयोजन करण्यात आले आहे. यामध्ये जिल्ह्यातील आठ तालुका आणि एक मुख्यालय असे एकूण नऊ क्रिकेट संघ सहभागी होणार आहेत.
यावेळी आयोजित स्पर्धा यशस्वी पार पडावी तसेच कोणतीही उणीव राहू नये यासाठी नियोजन करण्यात आले.
