देवगड : महाराष्ट्र राज्य मार्ग परिवहन महामंडळाच्या सेवेत उत्कृष्ट कार्य केल्याबद्दल देवगड आगाराचे चालक तथा वाहक चंदन सुरेश फोंडके यांना एसटीच्या 78 व्या दिनाचे औचित्य साधून मुंबई येथील मध्यवर्ती कार्यालयात ‘लालपरी गौरवरत्न पुरस्कार’ प्रदान करून गौरविण्यात आले. प्रामाणिक सेवा, समाजाभिमुख कार्य, उत्कृष्ट उत्पन्नवाढ, प्रवाशांच्या सुरक्षिततेसाठी घेतलेली दक्षता तसेच प्रसंगावधान राखून केलेल्या उल्लेखनीय कामगिरीची दखल घेत हा प्रतिष्ठेचा पुरस्कार देण्यात आला.
महाराष्ट्र राज्य मार्ग परिवहन महामंडळाचे अध्यक्ष तथा परिवहन मंत्री प्रताप सरनाईक आणि उपाध्यक्ष व व्यवस्थापकीय संचालक डॉ. माधव कुसेकर यांच्या हस्ते हा सन्मान प्रदान करण्यात आला. फोंडके यांच्या या यशामुळे देवगड आगाराच्या शिरपेचात मानाचा तुरा रोवला गेला असून त्यांच्यावर अभिनंदनाचा वर्षाव होत आहे.
