सिंधुदुर्ग जिल्हा व कोकणातील वैद्यकीय क्षेत्रासाठी अभिमानाची बाब ठरावी अशी उल्लेखनीय कामगिरी करत, देवगड मेडिकल फाउंडेशन येथील अस्थिरोग तज्ज्ञ डॉ. तन्मय आठवले यांना महाराष्ट्र ऑर्थोपेडिक असोसिएशनच्या प्रतिष्ठित MOACON 2026 परिषदेत MOACON Musketeer Badge व पुरस्कार प्रदान करून गौरविण्यात आले.
हा मानाचा पुरस्कार ऑर्थोपेडिक क्षेत्रातील दिग्गजांच्या उपस्थितीत प्रदान करण्यात आला. यामध्ये इंडियन ऑर्थोपेडिक असोसिएशनचे अध्यक्ष डॉ. नवीन ठक्कर, MOACON 2026 चे सेक्रेटरी डॉ. नारायण कर्णे, महाराष्ट्र ऑर्थोपेडिक असोसिएशन (२०२५–२६) चे पूर्व अध्यक्ष डॉ. संपत डुंबरे पाटील, महाराष्ट्र ऑर्थोपेडिक असोसिएशन (२०२६–२७) चे अध्यक्ष डॉ. अभिजीत वाहेगावकर , संचेती हॉस्पिटल पुणे येथील डॉ. पराग संचेती, डॉ. अजित दामले तसेच महाराष्ट्र ऑर्थोपेडिक असोसिएशनच्या कार्यकारिणी सदस्यांची मान्यवर उपस्थिती होती.
MOACON Musketeer Badge व पुरस्कार हा महाराष्ट्र ऑर्थोपेडिक असोसिएशनचा अत्यंत प्रतिष्ठेचा सन्मान मानला जातो. हा पुरस्कार अस्थिरोग क्षेत्रातील उत्कृष्ट कार्य, नेतृत्व, समर्पण आणि उल्लेखनीय योगदान यासाठी दिला जातो. यावर्षी संपूर्ण महाराष्ट्रातून फक्त ७ अस्थिरोग तज्ज्ञांची निवड या पुरस्कारासाठी करण्यात आली, ज्यामुळे या सन्मानाचे महत्त्व अधिक अधोरेखित होते.
विशेष म्हणजे, डॉ. तन्मय आठवले हे या पुरस्काराचे मानकरी ठरलेले सर्वात तरुण अस्थिरोग तज्ज्ञ आहेत. तसेच, सिंधुदुर्ग जिल्ह्यातून हा प्रतिष्ठेचा सन्मान मिळवणारे ते एकमेव अस्थिरोग तज्ज्ञ ठरले आहेत, ही बाब जिल्ह्यासाठी अभिमानास्पद आहे.
डॉ. तन्मय आठवले सध्या देवगड मेडिकल फाउंडेशन, देवगड येथे अस्थिरोग तज्ज्ञ म्हणून कार्यरत असून, त्यांनी आपल्या कौशल्यपूर्ण उपचारांमुळे आणि समर्पित सेवेमुळे अनेक रुग्णांचा विश्वास संपादन केला आहे. त्यांच्या उत्कृष्ट कार्याची रुग्ण आणि नागरिकांकडून सातत्याने प्रशंसा होत आहे.
याशिवाय, डॉ. आठवले यांनी अनेक राष्ट्रीय आणि आंतरराष्ट्रीय अस्थिरोग परिषदांमध्ये सक्रिय सहभाग नोंदविला आहे तसेच अनेक प्रतिष्ठित परिषदांच्या आयोजन समितीमध्ये त्यांनी महत्त्वाची भूमिका बजावली आहे. त्यांच्या या योगदानामुळे अस्थिरोग क्षेत्रातील शैक्षणिक आणि व्यावसायिक प्रगतीस मोठा हातभार लागला आहे.
या उल्लेखनीय कामगिरीबद्दल सिंधुदुर्ग जिल्ह्यातील नागरिक, रुग्ण, सहकारी डॉक्टर, मित्रपरिवार आणि हितचिंतकांकडून डॉ. तन्मय आठवले यांचे अभिनंदन करण्यात येत असून, या यशामुळे देवगड मेडिकल फाउंडेशन आणि संपूर्ण सिंधुदुर्ग जिल्ह्याचे नाव राज्यभर गौरवले गेले आहे.
डॉ. तन्मय आठवले यांना मिळालेला हा प्रतिष्ठेचा सन्मान त्यांच्या वैद्यकीय क्षेत्रातील समर्पण, उत्कृष्टता आणि सेवाभावाचे प्रतीक असून, तरुण डॉक्टरांसाठी तो एक प्रेरणादायी आदर्श ठरत आहे.
