सावंतवाडीत विशाल परब यांच्या संकल्पनेतील सिंधुदुर्ग भाजपाच्या भव्य जनसंपर्क कार्यालयाचा लोकार्पण सोहळा
भारतीय जनता पक्षाचे उत्साही युवा नेते विशाल परब यांच्या संकल्पनेतून उभारण्यात आलेले ‘भाजपा सिंधुदुर्ग जनसंपर्क कार्यालय’ आजपासून जनसामान्यांच्या लोकसेवेसाठी दाखल होत आहे या कार्यालयाचे भव्य उद्घाटन समारंभ बुधवार दिनांक ०५ नोव्हेंबर २०२५ रोजी दुपारी ४ वाजता सावंतवाडीतील माजगाव, शिरोडा नाका, मोर डोंगरजवळ पार पडणार आहे.
या सोहळ्यास भाजपा महाराष्ट्र प्रदेशाध्यक्ष रविंद्र चव्हाण आणि सिंधुदुर्ग जिल्ह्याचे पालकमंत्री नितेश राणे यांच्या मुख्य उपस्थितीत उद्घाटन होणार आहे. या कार्यक्रमाच्या निमित्ताने बहूप्रतीक्षेअंती राणे कुटुंबातील सदस्य ना. नितेश नारायणराव राणे आणि विशाल परब एकाच मंचावर पाहायला मिळणार आहेत. या जनसंपर्क कार्यालयामुळे सिंधुदुर्ग जिल्ह्यातील नागरिकांना पक्षीय कार्याशी संबंधित सुविधा अधिक सुलभतेने मिळणार असून, जिल्ह्यातील भाजपाचे संघटन कार्य आणखी बळकट होणार आहे.
सावंतवाडीपासून सिंधुदुर्गच्या कानाकोपऱ्यापर्यंत भाजपा कार्यकर्त्यांना मार्गदर्शन, संवाद आणि संघटनात्मक दिशा देण्यासाठी हे कार्यालय एक प्रमुख केंद्र ठरणार आहे. पक्षाच्या विविध योजना, उपक्रम आणि सामाजिक कार्यांसाठी हे जनसंपर्क केंद्र “जनतेशी थेट जोडणारा सेतू” म्हणून कार्य करेल, असा विश्वास व्यक्त करण्यात आला आहे.
या कार्यक्रमास जिल्हाध्यक्ष श्री. प्रभाकर सावंत, महिला जिल्हाध्यक्षा सौ. श्वेताताई कोरगांवकर, जिल्हा बँक अध्यक्ष श्री. मनिष दळवी यांसह जिल्ह्यातील सर्व पदाधिकारी, कार्यकारिणी सदस्य, मंडल अध्यक्ष आणि विविध मोर्चा-आघाड्यांचे पदाधिकारी मोठ्या संख्येने उपस्थित राहणार आहेत.सावंतवाडी विधानसभा मतदारसंघातील सर्व मंडल कार्यकर्ते देखील उत्साहाने सहभागी होणार आहेत.
युवानेते विशाल परब यांच्या या उपक्रमामुळे सावंतवाडीच्या राजकीय आणि सामाजिक वाटचालीत एक नवा अध्याय सुरू होत आहे, यात शंका नाही. त्यांच्या पुढाकारामुळे जिल्ह्यातील तरुण कार्यकर्त्यांना दिशा आणि प्रेरणा मिळणार आहे.
