
दापोली : दापोली शहरातील खोत गल्लीत मध्यरात्री मोठा गोंधळ उडाला. एका माथेफिरू नेपाळी युवकाने अचानक संतापाच्या भरात रस्त्यावर उभ्या असलेल्या वाहनांवर दगडफेक करत तोडफोड केली. या घटनेत तीन चारचाकी वाहने गंभीररीत्या नुकसानग्रस्त झाली असून, चार दुचाकी वाहनांना स्टँडवरून खाली ढकलण्यात आले आहे. रात्रीच्या सुमारास झालेल्या या प्रकारामुळे परिसरात एकच खळबळ उडाली. नागरिकांनी तत्काळ पोलिसांना घटनेची माहिती दिली.
माहिती मिळताच दापोली पोलिस तात्काळ घटनास्थळी दाखल झाले आणि संशयित युवकाला ताब्यात घेतले. प्राथमिक चौकशीत हा युवक नेपाळमधील असल्याचे आणि दापोलीतील एका हॉटेलमध्ये तो काम करत असल्याचे समोर आले आहे. या अचानक झालेल्या तोडफोडीमुळे वाहनमालक आणि स्थानिक रहिवाशांमध्ये भीतीचे वातावरण निर्माण झाले आहे. पोलिसांनी घटनास्थळाचा पंचनामा करून नुकसानग्रस्त वाहनांची नोंद केली असून, आरोपीवर कायदेशीर कारवाई सुरू केली आहे. घटनेचा पुढील तपास दापोली पोलीस करत आहेत. कोकणशाही दापोली










