दोडामार्ग
दोडामार्ग बाजारपेठेत डंपर आणि दुचाकीची समोरासमोर धडक होऊन अपघात झाला. मंगळवारी दुपारी १ वा. च्या सुमारास ही घटना घडली. यात दुचाकीस्वार व महिला किरकोळ जखमी झाले.
साटेली-भेडशीहून दोडामार्गच्या दिशेने येणारा एक डंपर दोडामार्ग बाजारपेठेत उभा होता. यावेळी बाजारपेठेत खरेदीसाठी एक युवक व महिला दुचाकीने आले होते. बाजारपेठेत तिलारी रस्त्यालगतच्या एका सुपर मार्केटमध्ये ते जात होते. यावेळी थांबलेल्या डंपरच्या समोरून सुपर मार्केटमध्ये जाण्यासाठी रस्ता असल्याने त्याने डंपरच्या पुढून जाण्याचा प्रयत्न केला. मात्र डंपर समोर आलेल्या दुचाकीकडे दुर्लक्ष करत डंपर चालकाने डंपर मार्गस्थ करण्यास घेतला अन् दोन्ही वाहनांची धडक बसून अपघात झाला. यावेळी दुचाकी डंपर खाली गेली. दुचाकीच्या मागे बसलेली महिला देखील डंपर खाली गेली. जीवाच्या आकांताने तिने आरडाओरड केली. शिवाय बाजारपेठेत उभ्या नागरिकांनी आरडाओरड केल्याने डंपर चालकाने डंपर तत्काळ उभा केला, त्यामुळे मोठा अनर्थ टळला. महिलेला डंपर खालून तत्काळ बाहेर काढले. यात दुचाकी स्वार व महिला अपघातात जखमी झाले. घटनास्थळी जमाव वाढू लागला. अखेर पोलिसांनी डंपर व दुचाकी थेट येथील पोलिस ठाण्यात आणले. डंपर चालक व दुचाकीस्वाराने आपापसांत हे प्रकरण तडजोडीने मिटविले.
